KALIBO, Aklan–Padayun nga nagahakot it libo-libong views, reaction ag share ro video nga gina-upload sa Facebook it mga persona sa likod it Wilbet TV.
Suno sa Aklanon content nga si Wilbert Cuarez, tumandok it Brgy. Cogon, Lezo nga masobra daywang dag-on pa eamang ro andang page nga nag-umpisa sa dahae ko kasagsagan it COVID-19 pandemic.
Ko una hay imaw eamang sigon ro naga-isaeahanon nga naga-ubra it video hasta nga naisapan nana nga sampiton ro iba pa kara nga kasimaryo.
Kaeabanan sigon sa content nga andang gina-ubra hay angot sa realidad it kabuhi ag mga makabueo-bueo nga senaryo.
Naging inspirasyon sigon nanda ro mga tawong nagasuporta kanda.
Sa makaron, may una eon nga masobra 29,000 followers ro andang page.
Samtang, aminado man imaw nga may kahigayunan nga nabudlayan sanda nga maka-produce it maabu nga video bangud sa kakueangan it gamit kapareho it camera.
Sa pihak nga parte, ginpakigbahin man ni Francis Tapang Cess, sambilog sa mga miyembro it Wilbet TV nga nagustuhan nana ro andang mga ginahimo nga content rason nga mas ginpili nana nga magbuylog kay Cuarez.
Nasayuran nga may dati eon nga Youtube channel si Francis kung siin kaeabanan sa anang video hay ‘mukbang’.
Owa sigon imaw nagduha-duha nga magpartisipar kay Cuarez bangud mabuhay eon sanda nga magkakilaea ag magkasimaryo.
