Masadyang ginpakigbahin it sangka Aklanon Fashion Designer ro anang mga inagyan ag ro ana mismo nga eksperyensya sa pagiging young-fashion designer.
Suno kay Mackey Beronio Dela Cruz, tumandok it New Washington ag isaea sa mga young-fashion designer it sa probinsya it Aklan nga pareho sa iba, nag-umpisa malang man imaw sa mga tela it kurtina ukon sa mga retaso nga tela. 15-anyos pa eamang sigon imaw hay nahilig eon imaw sa pag disenyo ag sa likod malang man it anang notebook naga-drawing.
Bangud sa anang hilig, nag-tuon man imaw it pagpanahi pinaagi sa anang lola nga sangka mananahi man sa andang probinsya sa Ilo-ilo. Naangkon sigon nana ro pagkahilig kara bangud pamilya sanda it mga artistic ag ro anang nanay ag lola hay suportado man sa fashion industry.
Dugang pa ni Mackey nga mabahoe ro pinagkaiba it fashion kato ag makara bangud kun dati hay plain eang, manami ro tabas ag manami ro fit hay pwede eon, makaron sigon hay may makaeain-eain eon nga termino it mga klase it eambong ag mas naging kritikal ro mga disensyo.
Pahayag nana nga ro pinakamalisod nga tela nga tahion para kana hay ro piña fabric nga ginakabig nga bugae it aton nga probinsya, bangud raya hay masyadong sensitibo ag mahae kaya kinahangean nag pulido ro pag tahi.
Paathag man ni Mackey nga ro anang forte hay paggamit it mismon tela sa pag-ubra it design ag uwa eon imaw nagagamit it mga stones ukon mga laces.
Padumdum man nana sa mga gusto man maging fashion designer nga indi mag-pundo nga maghandum ag pagkatiwalaan ro sarili bangud umpisa sa makaraung tikang hay masunod eon ro mga dapat matabo.
