KALIBO, Aklan—Nakauli eon sa probinsya it Aklan ro ginapabugae it mga Aklanon nga gold medalist athlete nga si Mary Francine Padios.
Matapos ro pilang kanselasyon sa anang byahe pauli sa anang pamilya hay sa katapusan nasunod eon gidman ro anang schedule kon siin malipayon imaw nga ginsug-aeaw sa Kalibo international airport.
Sa ginpatigayon nga press conference, gin-ako ni Francine nga maabo man ro hangkat nga anang gin-abutang antes ro pagsabak kara sa 31st Southeast Asian Games nga ginpatigayon sa Hanoi, Vietnam.
Sambilog eon sigon kara ro pagkaaksidente it anang ama kon siin eubus imaw nga naapektuhan sa training.
Antes sigon imaw nga nagpanaw sa Metro Manila hay ginbilinan pa kara ro anang ama ag bilog nga pamilya nga magtan-aw sa anang hampang sa SEA Games.
Sa pagkakita sa anang ama sa hospital hay ginpabaskog pa nana ro anang boot para sa anang pamilya ag ginbaeon raya nga inspirasyon kon siin nakuhit ro unang bueawan nga medalya para sa Pilipinas sa hampang nga pencak silat.
