KALIBO, Aklan–Posibleng igadungan it lokal nga gobyerno it Kalibo ro pagtao it ‘plaque of appreciation’ kay Aklanon gold medalist Mary Francine Padios sa andang igapatigayun nga aktibidad partikular ro pagtao it recognition sa mga empleyado ag Kalibonhon nga nagtao it dungog sa banwa makaron nga buean it Hunyo.
Raya hay matapos nga aprubahan it mga miyembro it Sangguniang Bayan ro sangka resolution nga nagatao it pagpasidungog kay Padios matapos ro pagkuhit kara it bueawan nga medalya sa kakatapos eamang nga 31st Southeast Asian Games nga ginhiwat sa Hanoi, Vietnam.
Suno kay Dianna Fegarido, Secretary it Sangguniang Bayan it Kalibo nga presenteng naga-usoy ro LGU it pondo para sa igatao nga financial assistance kay Padios.
Si Padios hay sambilog sa 18 atletang Pinoy nga sumabak sa nasambit nga biennial event.
Nasayuran nga nagbuesa eon ro Pinoy pencak silat warriors it sangka gold ag daywang silver medal ko 2019 Manila SEA Games.
Ro kadaeag-an ni Padios hay nagtao it mabahoe nga bugae bukon eamang sa banwa it Kalibo kundi sa kabilugan nga probinsya it Aklan.
