KALIBO, Aklan —- Eubus ro kalipay it mga Aklanon matapos koronahan bilang 2022 Miss Eco International ro pambato it Pilipinas ag tubong Aklan nga si Kathleen Paton.
Ginpatigayon makaron nga adlaw it Biyernes, Marso 18, Philippine time, ro coronation night it nasambit nga beauty pageant sa nasyong Egypt.
Gindeklarang first runner-up si Miss Belgium ag second runner-up si Miss USA.
Si Paton ro ikaywang Pinay beauty nga nakaangkon it Miss Eco International kasunod ni Cynthia Thormalla ko 2018.
Nagapanguna sa anang adbokasiya ro pagpabaskog it mental health ag pag-alaga sa palibot.
Ro 25-anyos nga si Kathleen hay natawo sa Isla it Boracay halin sa Australyanong ama ag Aklanon nga ina nga si Luz Sinag Paton nga tubong Laserna, Nabas, Aklan.
Imaw ro kamanghuran sa ap-at nga magmaeanghud ag nag-eskwela sa Laserna Elementary School ag ko ulihi hay nagsaylo sa eskwelahan sa Boracay.
Dag-on 2017 kat pasidunggan it Sangguniang Panlalawigan it Aklan ro Fil-Australian beauty matapos ro pagdaog kara sa Miss Teen International nga nakabo-oe pa it Miss Teen Charming special award nga ginpatigayon sa Bangkok, Thailand.
Kaibahan sa anang mga plano makaron ro magpasakop sa Binibining Pilipinas.
