KALIBO, AKLAN — Sa pihak it mga ginapangatubang nga problema ag hangkat sa kabuhi, nabayluhan it kalipay ro nabatyagan ni Atty. Kristina Jane Gonzales Nemis it Brgy. Tambak, New Washington, Aklan matapos nga makapasar sa 2016 bar examination.
Sa interview it Bombo Radyo, ginpahayag ni Atty. Nemis nga ginpasamaeatan nana ro Diyos ag ro suporta it anang pamilya sa anang pagkapasa.
Suno pa kana nga passion eon nana ro maging abugada bangud nga unga pa eamang hay raya eon ro anang ambisyon sa kabuhi.
Aminado man imaw nga naging kabado sa pagbo-oe it BAR exam, apang nasabat sigon nana ro mga mahaba nga mga pangutana.
Mabahoe nga hangkat suno kana sa annag pagbo-oe it exam hay ro pagmasakit it anang ina, apang nagdesisyon imaw nga magpakabakod.
Nag-eskwela suno kana imaw it tatlong semester sa College of Law it Aklan Catholic College samtang nagatrabaho sa sangka law firm ag ko ulihi hay nagsaylo sa Aklan Electric Cooperative (Akelco), apang nataw-an it kahigayunan nga makatrabaho sa Court of Appeals rason nga nag-transfer sa Manila ag samtang nagatrabaho hay nagpadayun imaw it law sa San Sebastian College Recoletos Manila.
Sa Centro Escolar University imaw nagtapos bilang Cum Laude it kursong AB Political Science.
Ginlaygay pa ni Atty. Nemis nga mag-focus sa pagbasa ag tun-an ro nagkaeain-eain nga kaso agud nga mas madaling maintidihan ro kasuguan sa nagkaeain-eain nga sitwasyon.
