Nakuhit it sangka Aklananong tourism student ro rank 1 sa Top 10 Most Outstanding Tourism Students of the Philippines matapos manguna sa nationwide evaluation nga ginpatigayon sa mga tourism students halin sa nagkaeain-eain nga parte it nasyon.
Suno kay Angel Kristine Ang, nga presidente man it Junior Tourism and Hospitality Management Association of the Philippines (JTHMAP) – Western Visayas, kaibahan sa naging basehan ro academic performance, leadership roles, community involvement, essay ag national-level interview.
Mageuwas kara, nakuhit man nana ro rank 1 para sa Top 7 Most Outstanding Regions for JTHMAP Western Visayas ag rank 5 sa Top 7 Most Outstanding Regional Officer.
Paathag ni Ang, kaibahan sa mga naging aktibidad it andang organisasyon ro mga seminars, promotional campaigns, outreach programs ag community extension activities sa Western Visayas.
Bilang sangka Aklanon, gin-taw-an nana it importansya ro kultura ag pag-tao it oportunidad sa mga katutubong Aeta it Aklan.
Sambilog sa anang mga naging nagapangunang proyekto ro AeTalupangod event, sangka daywang-adlaw nga aktibidad para sa Ati community sa Kalibo nga ginkaeakipan it youth empowerment, recreational activities ag community outreach programs.
Dugang pa ni Ang, tuyo nana nga padayunon pa ro mga inisyatibo para sa turismo, kultura ag komunidad, eabi eon it probinsya it Aklan apisar matapos ro anang pag-tuon.
