Eowas nga nakaabot sa Metro Manila ro Aklanon overseas Filipino worker kaibahan ro anang mag-ina halin sa Cairo, Egypt kon sa siin sanda ginbakwit it gobyerno it Pilipinas.
Una kara, nakaguwa sanda it war zone sa Khartoum, Sudan matapos ro pagbyahe it mahabang oras para eamang makaabot sa border kon sa siin naghueat kanda ro government officials it Pilipinas.
Ginpahayag ni Bernard Comia tubong banwa it Balete nga may mga ginpromisang bulig kanda ro Department of Migrant Workers ag Overseas Wokers Welfare Administration.
Napasaalima eon sigon kana ro katunga it P50,000 nga financial assistance it DMW ag P50,000 man sigon ro ginpromisa it OWWA.
Mag-eowas kara, may ginpromisa pa sigon kanda nga pang negosyo apang kinahang-ean pa nanda nga icomply ro mga requirements nga ginapangayo it gobyerno.
Eubus man sigon ro anang pagkanugon sa andang trabaho ag propyedad nga naaywanan sa nasambit nga nasyon apang mas importante sa makaron ro andang kabuhi nga eowas nga makauli sa andang pamilya sa probinsya it Aklan.
Sa makaron suno kana hay ginaproseso eon nana ro mga dokumento nga ginapangayo it gobyerno para maita-o eon ro bulig para kanda para may maumpisahan sa andang pagpangabuhi.
