Una eon sa kondisyon ro mga atleta it Region 6 para sa nagahilapit nga Palarong Panbansa 2026 nga pagahiwaton sa Agusan Del Sur.
Suno kay Jovie Ote, Jovie Ote, sangka manugturo ag athletics coach halin sa Aklan preparado eon nga mag-panaw ro delegado it Aklan makaron nga adlaw it Sabado, Mayo 16, kaibahan ro coaching staffs ag mga trainers.
Paathag nana, nagpatigayon it 30-days nga pag-ensayo ro bilog nga delegado, eabi eon sa mga team games, para nga mag-angkon it koneksyon ag bonding ro kada isaea.
Suno pa kana, una sa 48 ka mga atleta ro ginbuoe halin sa probinsya it Aklan sa nagkaeain-eain nga patag it hinampang, kaibahan ro Athletics, swimming, boxing, taekwondo, chess, basketball, weightlifting, ag pencak silat, kun sa siin naging overall champion raya sa nagtapos nga Palarong Pambansa 2025.
Dugang pa kara, ‘excited’ eon sanda sa bangud kun anda sigon nga tan-awon hay medjo kakaiba ro naging pagpahaom it Agusan Del Sur para sa paghost it nasambit nga kompetisyon.
Uwa man sigon sanda nakaangkon it anumang aberya pag-abot sa pinansyal, pag-ensayo ag sa andang preparasyon bangud nga suportado it lokal nga gobyerno ro mga atleta.
Sa makaron, padayunon nanda ro andang pagpanikasog nga mapabilin it Region 6 ro andang nakuhit nga ranko sa parehong hinampang ku nagtaliwan nga dag-on.
Pagahiwaton ro Palarong Pambansa 2026 sa maabot nga Mayo 24 hasta 31 it presenteng dag-on.
