KALIBO, Aklan–Naka-uli eon sa anang pamilya sa banwa it Makato ro sangka seafarer nga na-trap sa Ukraine matapos nga giyerahon it Russia ko nagtaliwan nga buean it Pebrero.
Suno kay Christian Darryl Magno nga mabahoe ro anang pagpasaeamat kaibahan ro iba pang mga Filipino seafarers matapos ro madinaeag-on nga pag-evacuate kanda, kun sa siin naeakip imaw sa unang batch.
Ginsaysay nana nga nasaksihan nanda ro waea-tuo nga pag-einupok ag pagpamomba it magtimbang nga parte.
Haeos indi man sigon sanda makatueog sa pagkaeabaka nga matamaan it missile ro andang barko.
Pilang domingo pa sigon antes sanda nga nabo-oe sa nasambit nga nasyon it embahada it Pilipinas.
Nasayuran nga samtang nagabo-oe it karga nga abono sa pantalan it Odyssa sa Ukraine hay owa eon sanda nakaguwa matapos nga nag-umpisa eon ro giyera.
Maabu suno kana nga barko sa nasambit nga pantalan nga may sakay nga mga pinoy ro gina-monitor it DFA eabi pa ag pila sa mga raya hay tinamaan it missiles sa black sea.
Sa pihak it natabu, haum gihapon imaw nga magbalik sa trabaho para sa anang pamilya.
Nagaeaum si Magno nga matapos eon ro giyera agud nga mapull-out ro andang barko ag makabalik eon sanda sa trabaho.
