Nagdaog it apat ka gold medals ag sangka silver medal si Aklanon singer ag musician Jade Edward Duran sa World Championship of Performing Arts sa United States.
Suno kay Duran, nag-umpisa ro anang pag-intra sa kompetisyon matapos makita sa Facebook ro audition para sa international competition sa Iloilo.
Uwa nana ginaeaom nga makapasar, pero nakapasar imaw matapos ro sangka minutos nga audition.
Nagpreparar imaw sa lima ka kategorya—open, pop, original works, rock ag world music—nga may nagkaeain-eain nga genre.
Kapin siyam ka buean ro anang preparasyon antes nagpadueong sa US.
Ginbalanse nana ro trabaho bilang web ag graphic designer ag programmer sa anang pagpraktis sa musika.
Nagpabulig man imaw sa vocal coach ag mismo nag-arrange it anang mga competition piece.
Sa kompetisyon, nagbuoe si Duran it gold sa open category, original composition, rock ag world music, samtang silver sa pop category.
Nakuha man nana ro medalya bilang semifinalist ag ginkilaea bilang overall champion sa open category sa anang age-group division.
Ginpahayag ni Duran nga mabudlay ro anang pagbiyahe ag pagpangita it pondo, eakip ro problema sa anang guitar nga uwa nakaabot sa US.
Sa bulig it mga sponsors, pamilya ag abyan, nakapadayon imaw sa kompetisyon.
Gintugyan man nana ro anang kadaeag-an sa tanan nga nagbulig ag nagsuporta sa anang pag-abot sa international stage.
