KALIBO, Aklan—Eubus ro kalipay nga nabatyagan it sangka Aklanon nga top 5 passer it June 2019 Nurse Licensure Examination nga ginpaguwa it Professional Regulation Commission (PRC) ko nagtaliwan nga adlaw.
Suno kay Joseph Dann Enero Jr., manami sa baeatyagon nga imaw ro nagrepresentar it probinsya sa prestihiyosong eksaminasyon nga ginahandom it tanan.
Ginhimo sigon kara nga inspirasyon ro anang mga ginikanan nga sanday Mr. Joseph Dann Enero Sr. ag Mrs. Janet Enero nga parehong nagatrabaho sa California, USA.
Suno pa kana, ro anang ginikanan ro eubus nga nagsalig kana nga makasueod imaw sa top 10 rason nga mas kapin pang nagbaskog ro anang buot ag ginhimo ro tanan kutob it anang masarangan agud nga inde mapas-eawan ro anang mga ginikanan sa andang expectation.
Ginpaathag kara nga bukon man it hangae ro naga-eskwela sa kursong nursing bangud nga nagakinahang-ean raya it sinsiridad ag pagtutok nga magata-o it maabong development ag improvement sa imu nga kaugalingon.
Sa makaron suno kana hay plano nana nga magbueo it iba pang eksaminasyon agud nga makasunod eon imaw sa anang mga ginikanan sa nasambitang nasyon.
Samtang sa pihak nga parte, ginpakigbahin ni Enero ro andang sikreto sa pagtuon ag sa pagbueo it nasambitang eksaminasyon nga nagdaea sa andang bilog nga barkada sa kadaeag-an.
Importante suno kana ro pangamuyo ag ro pagtutok gid sa pagtuon bangud raya ro magiging yabe sa pag-abot it mga handom sa kabuhi.
Nasayuran nga si Enero hay presenteng naga-istar sa Brgy. Dongon East, Numancia.
Nagtapos it elementarya sa Starglow Center for Academic and Arts ag nagsekondarya sa Regional Science High School for Region VI.
Samtang, nagtapos imaw sa kursong nursing sa West Visayas State University ag naging top 5 sa rating nga 86.60% sa kabilugang 5,059 passers sa nasambitang licensure examination.
