KALIBO, Aklan—Owa naging madali para sa grupong Aklanon Troopers ro pagkampeon sa ginhiwat nga PATIK BATTLE of the ATI ATIHAN BANDS para sa virtual nga pagpatigayon it 2022 Kalibo Sr. Sto. Niño Ati-Atihan Festival ko adlaw it Biyernes, Enero 14.
Suno kay Joey Lachica, miyembro it Aklanon Troopers nga haeos sang dominggo eamang ro andang naging preparasyon para sa kompetisyon.
Nagsentro sigon ro andang pag-ensayo sa pagpanami it tunog it andang pagpatik bangud raya ro ginabasehan para magdaog.
Ro nasambit nga grupo hay ginabilog it 15 tanan nga mga miyembro kung siin nagbaton sanda it 25,000 pesos nga premyo.
Ginpabugae pa ni Lachica nga raya eon ro ikaywang beses nga nag-uli sanda it kampeonato bangud una nanda nga nadag-an ro titueo ko 2018.
Limang grupo eamang ro nagpasakop sa nasambit nga kompetisyon nga ginhiwat sa Magsaysay Park.
Ro founder it Aklanon Troopers hay halin sa Pandakan, Manila kung siin nag-istorya ro mga miyembro nga daehon ro grupo sa Kalibo para makibuylog sa kasadyahan it Ati-atihan Festival umpisa ko dag-on 2011.
Sa pihak nga parte, gin-imbitahan man ro grupo nga magpatik sa igapatigayun nga caravan makaron nga adlaw it Kalibo Tourism Office.
