KALIBO, Aklan—Sa tuyo nga makabulig sa food security sa nasyon, naging madinaeag-on ro sangka young farmer nga maipakilaea ag maiduso ro anang programa ag innovations sa pagpanguma.
Nagpanguna si Jayson Merin it Promise Life Integrated Farm sa New Washington sa mga Young Famers Challenge Regional Level UPSCALE Awardees kon sa siin may katumbas raya nga financial grant nga P300,000 pesos.
Suno kana, bukon it madali ro pagpanguma bangud nga may mga strategies nga kinahang-ean para makapatubo it manami nga pananom.
Apang, bangud sa anang dedikasyon, hugod ag pagpursige hay sambilog imaw sa Aklan nga nakapatubo it tinuea nga repolyo nga sa eanas gintanom.
Una kara, may pwesto sanda sa Kalibo public market apang bangud sa pandemya hay nalugi ag gintestingan ro iba pang livelihood hasta sa nakaabot sa pagpananom sa kaeanasan nga nakata-o it trabaho sa iba pang pumueoyo.
Si Merin hay nauna eon nga nagdaog sa provincial level nga nakaangkon man it financial grant hasta sa nagpasakop eon raya sa regional level nga uwa man imaw napas-eawan bangud nga sambilog imaw sa mga nagdaog.
