KALIBO, Aklan–Nagaabot eon sa kabilugang 12,321 ro nailistang kaso it covid-19 sa bilog nga probinsya it Aklan.
Raya hay matapos nga madugangan it 38 nga mga nagpositibo halin sa 115 nga mga swab samples nga gintes sa laboratorya it Aklan.
Sa pinakaulihing datos maghalin sa Aklan Provincial Epidemiology Surveillance Unit it Provincial Health Office, sa nasambit nga numero hay onse ro maghalin sa banwa it Banga; tig an-om sa munisipalidad it Ibajay ag Madalag; lima sa Malinao; tatlo sa Malay; tig daywa sa New Washington ag Lezo; ag tig-sambilog maghalin sa banwa it Altavas, Numancia ag Makato.
Sa pihak kara, kapin eon man sa 11,700 ro mga nagmayad halin sa nasambit nga masakit matapos nga nagpaidaeom sa pagbueong ag quarantine procedure.
Sa makaron hay 311 eon lang ro aktibong kaso sa bilog nga probinsya nga ginakaeakipan it 213 nga una sa facility quarantine; 56 nga naka-home quarantine ag 42 ro admitted.
Samtang, nagapabilin sa 310 ro mga binawian it hueam nga kinabuhi bangud sa nasambit nga pandemya.
