KALIBO, Aklan—Padayon nga naganaba ro ginamonitor nga aktibong kaso it covid-19 sa bilog nga probinsya it Aklan.
Raya hay matapos nga ap-at nga kaso eon lang ro nailista it Aklan Provincial Epidemiology Surveillance Unit it Provincial Health Office nga ginakaeakipan it tig-sambilog maghalin sa banwa it Ibajay, Kalibo, Malay ag Malinao.
Ro nasambit nga kaso hay halin sa 28 ka mga swab samples nga gintest sa laboratoryo it Aklan.
Angot kara, kapin sa 12,460 eon ro nailistang kaso it covid-19 sa bilog nga probinsya kon sa siin 11,938 eon man ro nagmayad matapos nga nagpaidaeom sa pagbueong ag quarantine procedure.
Sa makaron hay 208 eon lang ro aktibong kaso it deadly virus nga ginakaeakipan it 155 nga una sa quarantine facility, 40 nga naka-home quarantine ag 13 ro admitted.
Samtang, nagapabilin sa 314 ro mga binawian it hueam nga kinabuhi halin kat nag-eopok ro pandemya.
