KALIBO, Aklan—Humampak eon sa kabilugang 27 ro numero it mga aktibong kaso it Coronavirus Disease 2019 ukon COVID-19 sa Barangay Poblacion, Kalibo.
Ginpahayag ni Punong barangay Niel Candelario it nasambit nga barangay nga kaabuan sa mga pasyente hay nakaangkon it exposure sa mga nauna eon nga nagpositibo sa deadly virus.
Pila sa mga raya hay halin sa C. Laserna Street partikular sa Purok 3 ag 4; Roxas Avenue Extensuon; Veteranz Avenue; Mabini Street Interior; XIX Martyrs Street ag Goding Ramos Street.
Ginakabak-ean man it opisyal ro pagtaas it numero it COVID-19 infection sa anang nasakupan eabi eon sa mga matawo nga lugar.
Ginpasiguro man kara nga hugut ro andang monitoring ag imbestigasyon agud daeayon nga makontrol ro sitwasyon.
Ginpahayag dugang nga nakalista sanda it 43 ka mga indibidwal nga high risk contacts ag nakataea nga ipaidaeom sa swab test.//Ro mga COVID-19 patient suno kana hay presenteng naka-facility quarantined ag hugut nga gina-monitor.
Nagapati man si Candelario nga mabahoe ro impact it mga gatherings sa paglobo it andang kaso rason nga ginpadumduman kara ro publiko nga limitahan ag likawan anay ro mga pagtililipon agud mapundo eon ro pagkalhit it COVID-19.
Samtang, ginpaathag man ni Candelario nga nabaton eon nana ro 1st dose it AstraZeneca COVID-19 vaccine kaibahan it mga Barangay Health Emergency Response Team ag Barangay Health Workers.
Suno kana, mabahoe ro naging impact it vaccination rollout para ma-engganyo ro publiko nga magpabakuna.
Aminado man si Candelario nga nakaangkon it pagtaas sa numero it mga pumueoyo nga gustong magpabakuna.
Pila sigon sa mga raya hay personal nga naga-adto sa andang opisina para magbuoe it form.
Pwede man suno kana nga fill up pinaagi sa online registration sa website it Vibrant Kalibo.
