KALIBO, Aklan—Kapin sa 512 eon lang ka mga aktibong kaso it covid-19 ro ginamonitor it Aklan Provincial Health Office sa bilog nga probinsya it Aklan.
Raya hay ginakaeakipan it 305 nga presenteng una sa facility quarantine; 151 nga naka-home quarantine ag 56 ro admitted sa hospital.
Ko mga nagtaliwan nga inadlaw hay nataeopangdan ro nagapadayon nga pagnaba it mga naililistang kaso it mga tinamaan it deadly virus kada adlaw.
Sa pinakaulihing datos nga ginpaguwa it Aklan Provincial Epidemiology Surveillance Unit it PHO, 24 eamang ro nagpositibo halin sa kabilugang 82 ka mga swab samples nga gintest sa laboratoryo it Aklan nga nahamtang sa provincial hospital.
Sa nasambit nga numero, tig-tatlo maghalin sa banwa it Balete ag Malay; tig-sambilog sa Banga, Madalag, Makato ag Malinao; lima sa Ibajay; pito sa Kalibo ag daywa sa Numancia.
Bangud kara, umabot eon sa kabilugang 11,920 ro nailistang kaso it covid-19 sa Aklan kon sa siin 11,109 kara ro naka-rekober matapos nga nagpaidaeom sa pagbueong ag qurantine procedure samtang umabot sa 300 ro mga binawian it hueam nga kinabuhi halin kat nag-eopok ro pandemya.
