Kapin sa 25 ro aktibong kaso it Covid-19 sa bilog nga probinsya it Aklan.
Sa nasambit nga numero, 16 kara ro symptomatic nga admitted sa nagkaeain-eain nga hospital.
Suno kay Elma Mae Pendon it Aklan Provincial Health Office, 13 nga kabanwahan sa bilog nga probinsya ro may nailista makaron nga kaso nga ginakaeakipan it banwa it Kalibo, Ibajay, Makato, Nabas, Tangalan, Batan, Malinao, Madalag, Banga, Numancia, Altvas, Balete ag Lezo.
Angot kara, panugyan nana nga dapat sundon gid it publiko ro mga minimum health standard nga ginpatuman bangud nga bukon eamang it sa probinsya it Aklan may kaso it covid-19 kundi maging sa ibang probinsya eabi eon sa Metro Manila.
Samtang sa pihak nga parte, bukon it maeayo nga ipatuman it uman ro strikto ag mandatoryong paggamit it facemask sa bilog nga probinsya kaparehas sa ginhimo it lokal nga gobyerno it Altavas.
Raya suno kay Pendon ro sambilog sa mga pamaagi agud nga inde magkalhit ro virus ag inde eagi matapnan ro kada isaea.
Ginpaathag dugang nga inde magsalig sa virus maskin nga protektado it covid-19 vaccine bangud nga posible gihapon nga matapnan it virus apang bukon gid it tuman kalala.
