KALIBO, Aklan—Naging emosyunal ro sangka fur parent matapos nga mamatay ro anang alagang ayam bangud sa baeatian .
Suno kay Albert Manalo nga bangud nga ginakabig nana nga mga kaugalingon nga unga ro anang mga alagang ayam rason nga gintaw-an nana it disenteng lamay ro anang namatay nga ayam sa Oyo Torong St. Kalibo.
Kapareho sa ordinaryong lamay nga ginatau sa namatay nga tawo, nakabutang man sa sangka kabaong ro anang ayam nga si Miko .
May nakapalibot nga bueak sa kabaong it ayam ag may nakatungtong nga nakasindi nga kandila kara.
Ginpahayag ni Manalo nga ginakabig nana nga unga ro aspen nga haeos 15 anyos nana nga gin-alagaan antes nga nagtaliwan sa pihak nga kinabuhi ko nagtaliwan nga adlaw bangud sa paghaeok it anang spleen.
Maskin nga masakit ro pagkamatay it anang alaga nga anang gintangisan hay ginapilit sigon nana nga indi masyadong maapektuhan bangud nga 70 anyos eon imaw ag bawae nga ma-stress ag madepress.
Grabe suno kana ro andang bonding it ayam nga owa nana ginakabig nga sapat kundi tawo bangud nga mag-eowas nga malambing hay nagahulid man sanda nga magkatueog.
Samtang, ro anang an-um nga bilog nga ayam nga gina-alagaan kaibahan ro namatay nga si miko hay ginboe-an sigon nana it tigsambilog nga yaya agud nga maasikaso ro andang kinahangeanon ag mabantayan it husto.
Ginahandaan man sigon nana ro mga raya kada mag-abot ro andang birthday.
