Kalibo Aklan ———Masyadong delikado ag mapangsamad engkaso nga maggamit it chemical ukon biological weapons ro Russia matapos nga medyu tagilid ro andang ginlunsar nga giyera kontra sa kaiping nga nasyong Ukraine .
Suno kay Bombo International Correspondent Greg Aguilar it California USA nga nauna eon nga nagpaandam si US President Joe Biden sa anang pag-abot sa main headquarters it NATO sa Brussels, Belgium .
Tuyo sigon it anang pagbisita nga makipag-pueong sa mga lider it Europe ag mga nasyong miyembro it NATO.
Nagbilog eon suno kana si Biden it team nga ginaeakipan it national security officials nga ginatawag nga “tiger team”.
Kaibahan sa andang misyon ro mag-develop it mga estratehiya ag option para sa US ag NATO engkaso nga gumamit ro Russia it tactical nuclear weapons ukon chemical weapons nga mas kilaea man sa tawag nga weapons of mass destruction sa Ukraine agud nga malikawan ro pagkapierde sa giyera .
May batasan sigon si Russian President Vladimir Putin nga indi maka-intigo nga magbaton it kapierdihan .
Sa makaron hay haeos 10,000 eon nga mga soldadong Ruso ro napatay sa andang pagsueod sa Ukraine sa sueod eamang it ap-at nga domingo nga bakbakan .
Ro ulihing armas sigon nga posibleng pagagamiton ni Putin hay maisot eamang nga ginatawag nga battlefield nuclear weapons apang kapareho it atomic bomb nga ginhueog sa Hiroshima ag Nagasaki ko world war 2 nga ginkamatay it masobra sa 200,000 nga katawo ag hasta sa makaron hay nabatyagan ro anang maeain nga epekto.
