KALIBO, Aklan—Haum ro mga vendors it Kalibo public market nga magsaylo sa gintaeana kanda nga relocation site sa Eastern Side Terminal sa San Lorenzo Drive sa Barangay Andagao agud nga taw-an it daean ro modernization project it tindahan.
Raya ro ginpahayag ni Noe Pador, market supervisor it Kalibo public market.
Suno kana nga mismong ro contractor it proyekto ro nagpamalibad sa hinyu it Kalibo Public Market United Stall Owners and Vendors Association nga ibutang sanda temporaryo sa kilid it tindahan sa Toting Reyes St.
Bangud nga ground zero sigon ro paga-obrahon hay kinahangean nga mapatuman ro kaeowasan it tanan.
Mag-eowas kara, pagagamiton ro nasambit nga kalye nga pagabutangan it andang mga heavy equipment ag materyales.
Samtang, haum eon suno kana ro mga stalls para sa fish and meat section sa nasambit nga lugar.
Apang magabutang it dugang nga mga stalls para sa vegetable ag dry goods section.
Sa pihak nga parte, gindugang pa ni Pador nga antes nga makasaylo sa relocation site hay kinahangean anay nga mag-sekyar it updated nga mayors permit ro mga vendors.
Target kara nga masaea ro mga delingkwente nga mga stall owners eabi pa ag nagakinahangean ro lokal nga gobyerno it Kalibo it pondo para sa modernize it tindahan.
Ro modernization it tindahan nga ginaboeobanta nga nagabalor it 300 milyon pesos hay paga-umpisahan sa oras nga makasaylo ro mga vendors .
Maeawig eon man sigon nga tiempo ro gintau sa mga vendors agud nga maging haum para sa andang pag-transfer.
Ginaeauman nga raya hay matapos sa sueod it sang dag-on.
Madumduman nga ko Lunes, Mayo 27 hay naka-transfer eon ro mga public utility jeepneys nga nagabiyahe sa eastern side sa andang relocation site sa F. Quimpo st sa kilid it sangka mall.
