Padayun ro manami nga kampanya ni Alex Eala matapos kara nga piyerdihon si Mananchaya Sawangkaew it Thailand, sa score nga 6-3, 6-2, agud nga makasueod sa semifinals it Birmingham Open ko Sabado.
Maskin nga matsa nabudlayan sa umpisa it hampang kontra sa Thai netter, naangkon it Filipina Tennis star ro momentum it hampang rason nga naselyuhan ro anang pagdaog sa sueod it sang oras ag 21 minuto.
Sa ikaywang set, nakabo-oe pa it 2-1 si Sawangkaew bago nakabawi si Eala ag nagdaog sa limang sunod nga hampang rason nga eubusan kara nga gintapos ro hampang.
Makarondaya man ro natabu sa unang set kun sa siin naging patas ro hampang sa 1-1 ag nagdaog sa ap-at nga magkasunod nga games para mabo-oe ro mabahoe nga 5-1 nga abanse antes nga isarado ro set, sa score nga 6-3.
Bangud sa kadaeag-an, daywang hampang eon lang ro kinahangean ni Eala agud nga maiuli ro anang ikaywang WTA 125 title matapos mabo-oe ro kampeonato sa Guadalajara ko nagtaliwan nga dag-on.
