KALIBO, Aklan—Aminado si Nabas mayor James Solanoy nga maskin nga maeaw-ay, apang naging epektibo ro pag-kordon ukon pagbutang it yellow lane sa sangka baeay nga may nailistang nagpositibo sa COVID 19 sa andang banwa.
Suno kana nga bangud kara hay amat-amat nga nagnaba ro andang mga nailistang kaso ko nagtaliwan nga mga inadlaw.
Base suno kana sa andang pinaka-ulihing datos, may una sanda nga kabilugan nga 338 nga kaso umpisa nga magtuhaw ro pandemya, kun sa siin 131 ro active cases ag lima ro namatay.
Sa pihak kara, dismayado man si mayor Solanoy bangud nga sa pihak nga naging epektibo ro ginpatuman nga “bantay mo, tupad mo” kontra sa deadly virus hay may naka-abot kana nga balita nga may pilang residente gihapon ro nagasueod sa mga baeay nga naka-kordon.
Gindugang pa nga may mga pumueuyu gihapon ro pasaway sa health and safety protocol partikular ro owa pagsuksok it face mask sa guwa it andang baeay.
Sa pihak kara, bastante pa sigon ro andang mga available nga kwarto it andang local covid center.
