Nagpasaka si Mayor Shimonette Francisco it New Washington it kaso nga cyber libel kontra sa sangka ginakilaea nga si alyas “Inday” nga dating staff sa Mayor’s Office ag si Kagawad Niño Nadura .
Suno kay Francisco, nag-ugat ro kaso matapos ro imbestigasyon sa Facebook account nga ginakabig nga may kaangtanan sa pag-post it mga mapanamad ag malisyoso nga pahayag kontra sa kana ag ana nga pamilya.
Eakip sigon sa mga post hay may mga pahayag kontra sa anang asawa ag menor de edad nga mga unga, pati mga pagpamahog ag litrato sa palibot it anda nga baeay.
Suno pa sa alkalde, may dating kaso nga 12 counts it cyber libel kontra sa account holder nga ginatumod nga si Kagawad Nadura, samtang masobra 40 counts mat-a ro igapasaka kontra sa dating staff.
Matapos ro proseso sa korte ag kasugtanan kaangot sa plea, nagbag-o ro kaso halin cyber libel paadto sa simple nga libel, ag nag-plead guilty ro akusado sa mas maugan nga pag-eabag.
Bangud kara, posible imaw nga mangin saksi sa bag-o nga kaso.
Ginklaro ni Francisco nga ro alyas “Inday” hay anay staff it Mayor’s Office ag may sayod parte sa ana nga personal nga sitwasyon bangud sa ana nga pagtrabaho kara sa opisina.
Suno sa alkalde, ginpahaum eon it legal team ro mga dokumento para sa pagsampa it mga kaso sa korte.
