Dismayado ro Alliance of Concerned Teacher’s Partylist sa madasig nga paghueag it ginaduso nga Maharlika Investment Fund.
Raya hay matapos nga ginpalig-on it Kamara sa ikatlong pagbasa ro House Bill 6608 ukon Maharlika Investment Fund antes daeayon nga matapos ro sesyon it Kongreso para sa dag-on 2022.
Nauna eon nga ginsertipakahang urgent ni Pangueong Ferdinand Marcos Jr.ro nasambitang proposisyon.// kapin sa 279 lawmakers ro bumoto pabor sa proposisyon samtang an-om ro uwa nagpabor kara.
Suno kay ACT partylist representative France Castro, uwa it nahimo ro minority para punggan pa ro pagdaeagan it nasambit nga hagna maskin nga hugot sanda nga nagapamaeabag kara.
Raya hay matapos nga uwa sigon pag-istudyuhi it husto kon anu ro ikamayad kara ag kon anu ro magiging resulta kara sa pagtaliwan it mga dinag-on.
Nasayuran nga tuyo it MIF Bill nga tipunon ro pondo it government financial institutions ukon GFIs agud ikapital ag makabuoe it mas mabahoe nga kita nga imaw man ro igataeana sa mga pambansang programa ag proyekto it gobyerno kaparehas sa kuryente, agrikultura ag transportasyon.
Magaserbeng paunang pondo ro P50 billion halin sa Landbank of the Philippines, P25 Billion halin sa Development Bank of the Philippines ag 100% it dibidendo it Bangko Sentral ng Pilipinas, kamana man ro napueong porsyento it gaming revenues halin sa PAGCOR ag iba pang government-owned gaming operators.
