Ginakwestyon it Alliance of Concerned Teachers – Philippines ro insigidang implementasyon it Department of Education (DepEd) nga trimestral system para sa School Year 2026-2027.
Suno kay Ruby Bernardo, National Chairperson it nasambit nga grupo, nakaangkon sanda it survey sa mga manugturo kon sa siin nadiskubrehan nga uwa it maid-id nga konsultasyon nga natabo angot sa nasambit nga plano.
Dugang pa nana, uwa sanda nagapamaeabag sa kon anuman ro gustong ipatuman nga reporma sa sektor it edukasyon apang ro nagapangunang ginakabaeak-an kara hay ro adjustment nga matabo maghalin sa grading system, paperworks ag maabong iba pa.
Kon ro gusto it gobyerno nga masolusyunan ro krisis sa edukasyon, bukon it pagbag-o sa school calendar ro kinahang-ean kundi ro dugang nga teaching ag non-teaching personnel, classrooms ag ro bilog nga suporta para sa mga manugturo.
Nagakadapat gihapon nga mausisa raya it husto maistoryahan it mayad ro gustong reporma antes raya ipatuman.
Madumduman nga nauna eon nga ginpahayag it DepEd nga ginatun-an kara ro pagpatuman it trimestral system bilang kaparte it sangka “holistic approach” sa mas balanseng time management it mga estudyante ag mas masoehay nga pagturo it mga manugturo.
