KALIBO, Aklan—Gin-engganyo ni Altavas Mayor Denny Refol ro mga Public Utility Vehicle (PUV) drivers nga nagabiyahe sa andang banwa nga magdangop sa anang opisina para maistoryahan ro andang reklamo.
Raya hay kasunod it naging pahayag it tagreklamong si Mr. Jose Melanie Payba matapos nga gina-alegar nga napaea ro anang pangaean sa listahan it mga benipisyaryo rason nga owa imaw makabaton it financial assistance halin sa Land Transportation Franchising and Regulatory Board (LTFRB).
Suno sa alkalde, ko Disyembre 2020 nag-abot ro kompletong listahan halin sa LTFRB Regional Office kung sa siin pagkabaton sigon kara it DSWD office hay insigida rayang ginforward sa “listahanan”
Nagaguwa sigon nga kung ro sangka benipisyaryo hay nakabaton eon bulig it halin sa gobyerno kapareho it Social Amelioration Program (SAP) ag miyembro it 4Ps hay indi eon raya pwedeng masakop it programa.
Dugang pa ni Mayor Refol nga bukon it LGU ro nagpili it mga benipisyaryo bangud nagpaidaeom sigon sa verification ro listahan.
Ginpasiguro man it opisyal nga pagatinguhaon karang mataw-an it ayuda ro mga driver nga owa maeakip sa kwalipikadong benipisyaryo.
Nasayuran nga kapin sa 6,000 pesos ro ginatao nga bulig-pinansyal it LTFRB para sa mga driver nga naapektuhan ro paeangitan-an kasunod it pagpanaeasa it Coronavirus Disease 2019 ukon COVID-19 pandemic.
