Maayos eon ro kahimtangan it sangka 57-anyos nga tatay matapos nga eab-on it anang kaugalingon nga unga.
Suno kay PCpt. Machon Sabado, officer in charge it Buruanga Municipal Police Station, natabo ro insidente bandang alas-10 it gabie ku adlaw it Dominggo, Hunyo 28 sa mismong baeay it biktima sa Sitio Bunga-bungan, Brgy. Tigum sa nasambitan nga banwa.
Base sa andang imbestigasyon, nag-angkon it mainit nga diskusyon sa tunga it mag-ama kat sitahon it biktima ro 37-anyos nga suspek angot sa pag-sinueod it anang alaga nga kuring sa baeay it biktima samtang sanda hay naga-inuman.
Bangud sa diskusyon, ginbasag sigon it biktima ro speaker nga andang ginagamit rason para nga mag-init ro ueo it suspek ag umuli raya. Apang pag-balik hay may daea eon raya nga pataeum ag daeayon nga gin-eabo ro anang anang ama.
Nag-angkon sigon it lastro sa ueo ag nagkaeain-eain nga parte it anang eawas ro biktima, nga eagi man nga gindaea sa pabueungan. Insigida man nga nadakpan ro suspek apang nagdesisyon ro asawa it biktima nga indi eon pasakaan it kaso ro anang unga matapos nga magdihon it affidavit of non-interest to file a case.
