KALIBO, Aklan—Amat-amat eon nga nagabalik ro kapagsik it mga international flight sa Kalibo International Airport.
Suno kay Engr. John William Fuerte, Manager it Civil Aviation Authority of the Philippines (CAAP)-Aklan nga naga-abot sa ap-at hasta limang international flight ro nagahugpa sa paeuparan kada adlaw.
Samtang, ro domestic flight hay may pitong biyahe kada adlaw nga naga-average it 130 hasta 150 passenger sa kada airline.
Sa pihak kara, may sangka ground handler eon man sigon nga nakipag-angot kana ag nagpasiguro nga magabalik eon ro iba pang international flight sa mga masunod nga buean.
Sa makaron, nagapabilin nga ro T-Way hay may daywang flight sa sueod it sang adlaw nga may average nga 130 hasta 150 arriving ag departing passenger; AirSeoul hay may ap-at nga beses kada dominggo nga biyahe ag may average nga 150 hasta 180 passenger samtang ro Tiger Airways nga may biyahe kada adlaw it Martes, Huwebes ag Sabado hay may average man nga 130 hasta 150 passenger.
May kaangtanan kara, ginklaro ni Engr. Fuerte nga ro naghugpa nga Singaporian Airline ko nagtaliwan nga dominggo hay sangka chartered flight eamang.
Raya hay matapos nga mag-request si Mr. Bong Tirol ko Pebrero 23 para sa mga bisita it sangka kasae nga ginhiwat sa kilaeang resort sa isla it Boracay.
Ro natungdan nga chartered flight hay may sakay nga 125 wedding guest halin Singapore.
