KALIBO, Aklan—Amat-amat eon nga nagabalik sa normal ro pagpangabuhi sa United Kingdom bangud sa madinaeag-on nga vaccination roll-out.
Suno kay Bombo International Correspondent Merds Vidal it London, UK ag tumandok it Brgy. Bulwang, Numancia nga owa eon it na-monitor nga traces it coronavirus sa mga bus ag iba pang pampublikong lugar.
Apang ginatun-an pa sigon it gobyerno ro mga tikang kon paalin nga mapatuman ro amat-amat nga paghaeuga it lockdown rason nga ginabawae pa ro mabahoe nga mass gatherings agud nga indi maeabag ro social distancing.
Required gihapon sa mga residente ro pagsuksok it face mask ag pirmeng pagsanitize it alima.
Gindugang pa kara nga owa eon it masyadong nailistang pasyente nga nakaangkon it seryosong sakit ukon namatay bangud sa covid infection.
Bangud man sa maeapnagon nga pagbakuna sa mga vulnerable sector, sangkiri eon ro mga ginadaea sa ospital.
Naging mabahoe suno kana nga bulig ro mga ginpatuman nga national lockdown agud nga matapna ro pagkalhit it virus.
Sa masunod nga domingo suno kana hay ginaeauman nga magabukas eon ro mga non-essential shops kapareho it mga hair salons, gyms ag outdoor service sa mga pubs ag restaurants.
Balik eon sigon sa normal ro ekonomiya sa United Kingdom.
Maskin nga ro britanya ro sambilog sa may pinakamadasig nga vaccine rollouts sa bilog nga kalibutan, apang ro death toll hay ro pinakamataas sa bilog nga Europa nga nag abot sa masobra sa 127,000 umpisa nga magtuhaw ro pandemya.
