KALIBO, Aklan—Amat-amat eon nga nagakaduea ro pangaean ni dating US president Donald Trump sa New York City matapos nga gin-terminate it gobyerno ro anang mga kontrata ag ko anang mga kompaniya bangud sa gina-alegar nga pagsoesoe sa anang mga tagasuporta nga magpatigayon it madugo nga riot sa capitol may daywang domingo eon ro nagtaliwan.
Apang suno kay Bombo International Correspondent Alvin Mobo nga ko kan-o eamang hay napabalita pa ro pagbakae it property it unga ni Trump nga si Donald Trump Jr., sa New York.
Suno kana nga kompaniya ni Trump hay naga-operate it ap-at nga attractions sa siyudad nga ginaeakipan it daywang ice-skating rinks sa Central Park, carousel ag Golf course sa Ferry Point.
Mag-eowas kara, nagapanag-iya man sanda it mga hotel ag a condominium.
Suno kay Mobo nga 2019 pa hay naghalin eon si Trump sa nasambit nga siyudad ag nagsaylo sa Florida.
Bangud sa mga lockdown hay matsa ghost town eon suno kana ro New York ag nagpaeanaw eon ro mga negosyante ag mga residente kapareho it pamilya it dating US president.
Sa pihak nga parte, maskin nga nakapanumpa eon bilang bag-ong US president, ginatawag sa gihapon it mga die hard supporters ni Trump si Joe Biden bilang illegitimate president bangud nga owa napamati-an sa korte ro mga ebidensiya angot sa election fraud.
