KALIBO, Aklan—Amat-amat eon nga nagataas ro numero it mga pasahero nga naga-aeabutan sa Kalibo International Airport.
Raya ro ginpahayag ni Civil Aviation Authority of the Philippines ukon CAAP-Aklan manager Engr. Eusebio Monserate Jr. matapos nga uman nga buksan ro commercial flight operation sa nasambit nga paeuparan ko Oktubre 1.
Hugut sigon nanda nga ginasunod ro ginpaguwa nga executive order ni Aklan governor Florencio Miraflores nga sangka flight eamang ro ginapasugtan kada adlaw, kun sa siin ro scheduled flights it cebu pacific hay kada Lunes, Miyerkules ag Sabado samtang ro Martes ag Huwebes hay ana it AirAsia Philippines.
Ro Philippine Airlines hay naga operate kada biyernes ag domingo.
Samtang, ginklaru man ni engr monserate nga pwedeng maka-agi sa kalibo international airport ro mga pasahero nga nagahalin sa antique ag Iloilo basta nga may nagakaigo nga koordinasyon sa andang natungdan nga local nga gobyerno, kun sa siin raya ro magasueang kanda halin sa holding area it paeuparan.
Kaabuan suno kana sa mga pasahero hay mga returning overseas Filipino workers, locally stranded individuals ag authorized persons outside of residence.
Pila sa mga minor nga problema nga andang ginapangatubang hay ro pagtipon it mga pasahero bangud sa delay nga pagsueang kanda.
Samtang, ro mga turista nga nagabakasyon sa isla it Boracay hay maga-agi eamang sa caticlan airport.
Ginpadumdum pa ni Engr. Monserate nga antes nga magbiyahe hay makipag-angot anay sa andang natungdan nga airline companies agud nga malikawan ro anuman nga aberya.
