KALIBO, Aklan—Uman nga pagapasugtan nga magbalik ag magbaligya ro mga ambulant vendors sa dating ginakahimtangan sa Toting Reyes St. Kalibo matapos nga ipaidaeum ro Aklan sa alert level 1 ukon new normal status.
Suno kay Market Supervisor Abel Policarpio nga ginpaboran ni Kalibo Mayor Emerson Lachica ro hinyu it ambulant vendors association nga makabaligya eon man sa nasambit nga lugar kada domingo ukon market day, apang kinahangean sa gihapon nga magsunod sa hugut nga sueundanan it physical distancing ag pagsuksok it face mask bilang proteksyon.
Sa kamatuoran suno kana hay magapatigayon sanda it dry-run hin-aga nga adlaw it domingo agud nga makita ro aktwal nga sitwasyon sa uman nga pagbalik it presensiya it mga street vendors.
May nakaplastar sigon nga contingency plan ag sketch plan ro local government unit agud nga maging maayos ag masiguro ro kaeowasan it parehong vendor ag konsumidor.
Base sa record, ro nasambit nga asosasyon hay may kapin sa 300 nga mga miyembro nga puro fully vaccinated eon.
Sa pihak nga parte, ginkumpirma ni policarpio nga naging maayos eon ro kahimtangan sa sueod it kalibo public market ag owa eon it may mga nailistang paeanakawan.
Suno kana nga antes nga ginsabak sa duty ro mga bag-ong assign nga mga security guard halin sa bag-ong security agency hay ginpaidaeum anay ro mga raya sa orientation.
Sa pihak nga parte, ginaproseso eon makaron ro pagbakae ag pag-install it mga CCTV cameras nga igabutang sa mga strategic areas sa sueod it kalibo public market.
Base sa anang proposal, kapin sa 11 nga CCTV ro gin-request nga pagabak-eon nga gina-usuyan pa it pondo makaron.
