KALIBO, Aklan—Naging mainit eon ro sitwasyon sa America samtang nagahilapit ro adlaw it presidential election.
Raya hay matapos nga may kanya-kanyang pasabog ro mga nagapailihir nga kandidato partikular sanday Democratic presidential nominee Joe Biden ag incumbent Republican US president Donald Trump.
Suno kay Bombo International Correspondent Eunice Burns sa Portland, Maine, USA, eubus nga nagakabaeaka makaron ro mga Americans sa napabalitang pagsuporta it nasyong China ag Russia sa candidacy ni Biden.
Engkaso sigon nga madaog bilang presidente si Biden hay may posibilidad nga masakop it komunistang nasyon ro Estados Unidos matapos nga may posisyon ro onga ni Biden sa mabahoe nga kompanya sa China kon sa siin nagasweldo sigon raya it milyon-milyon kada buean.
Ginatan-aw sigon nanda nga ro pagbulig it China ag Russia kay Biden hay may mabahoe nga kabaylo ag raya hay ro pagsakop sa andang nasyon.
Ginpaathag dugang nga uwa eon it kapas si Biden para dumaeahan pa ro nasyon bangud sa anang edad maskin hambaeon pa nga batikan eon raya sa pulitika.
Samtang, engkaso sigon nga mailihir it uman si Trump hay mapadayon kara ro anang tuyo sa nasyon nga mas eabi pang mapaumwad ro ekonomiya pinaagi sa pagtangkilik sa kaugalingong produkto ag ginpromisa kara nga eubusang pagadueaon ro produktong naga-eksister nga bukon it produce mismo sa USA.
Bussiness tycoon sigon si Trump rason nga ro focus kara hay ro pagpaumwad sa ekonomiya maskin nga ro iba pa nana nga programa hay uwa ginapaboran it ibang mga Americans.
