KALIBO, Aklan–Bangud sa pag-eapnaag it kaso it Omicron variant it COVID-19 sa Amerika, posibleng uman nga makaangkon it mabahoe nga adjustment pag-abot sa pagpatigayun it mga social gatherings eabi eon sa pagsug-aeaw it bag-ong dag-on.
Suno kay Bombo International Correspondent Greg Aguilar it California, USA nga ginalimitahan anay makaron it gobyerno ro mga pagtililipon agud nga indi makaangkon it surge sa deadly virus.
Ro daywa sa pinaka-popular nga destinasyon it mga pumueoyo sa Estados Unidos kada New Year’s Eve hay ro Time Square sa New York ag Las Vegas Strip.
Kat owa pa it pandemya, ro Time Square suno kana hay ginadagsa it kapin sa 58,000 ka mga indibidwal maghalin sa nagkaeain-eain nga estado apang makaron hay ginlimitahan eamang sa 15,000 ro pwedeng makatambong it fireworks display sa lugar kamana man nga dapat hay bakunado ag nagasuksok it face mask.
Maskin ro saeo-saeo hay limitado eamang sa bilog nga pamilya.
Raya hay bilang pagdahan ag masiguro ro kaeuwasan it kada isaea.
Dugang pa ni Aguilar nga nagaprepara man it maabu nga mga pagkaon ro mga Amerikano kada New Year’s Eve.
Samtang, patok man sa mga Filipino-American ro mga fiesta food bangud mahilig ro mga raya sa Filipino dishes.
