KALIBO, Aklan— Nagapangatubang makaron sa kasong pageabag sa Republic Act 10591 ukon Comprehensive Law on Firearms and Ammunition ro sangka Amerikanong soldado matapos nga maboe-an it armas sa Caticlan Jetty Port, Malay, Aklan.
Nakilaea ro suspek nga si Mr. Tevin Lavell Vaughn, 24, aktibong soldado ag residente it 412 Buckskin Rd., Hagerman, New Mexico, USA.
Base sa paunang imbestigasyon it Malay Police Station, magapasueod eon kunta sa entrance it jetty port ro suspek , apang sa anang pag-agi sa screening area hay nataeupangdan it x-ray machine operator sa screen ro imahe it short fire arm nga nakasueod sa backpack.
Bangud kara, insigidang gin-usisa it mga otoridad ro nasambit nga bag ag nakita ro sangka unit it black 9mm pistol Smith and Wesson, Springfield, MA USA, nga may serial number HVH2036 ag loaded it sangka magazine nga may waeong bala.
May kaangtanan kara, owa it may maipakitang nagakaigo nga dokumento ro dumueuong sa pagdaea ag pagtransport it armas rason nga insigidang gindaea sa estasyon it pulisya para sa nagakaigo nga disposisyon.
Nasayuran nga ro dumueuong nga soldado hay magabakasyon kunta sa Boracay apang naunsyami raya bangud nga presente imaw nga nakakulong sa Malay Police Station.
