KALIBO, Aklan—Aminado ro sangka teller it Small Town Lottery ukon STL sa probinsiya it aklan nga bangud sa mga nagakalhit nga illegal gambling “bookies” rason nga uman nga nagnaba ro andang koleksyon.
Suno kay alyas Toto nga ko buean it Nobyembre ag Disyembre ko nagtaliwan nga dag-on hay naga-abot sa P7,000 hasta P10,000 pesos ro andang koleksyon kada adlaw kadungan sa mas ginhugtan nga kampanya it kapulisan kontra sa illegal gambling.
Ginpahayag dugang nga daywang grupo ro naga-operate kara sa Aklan.
Kumpara kanda nga lehitimong mga nagapataya nga nagapabilin eamang sa andang booth, ro bookies suno kana hay nagalibot ag naga-house-to-house rason nga mas abu ro andang kita.
Nasayuran nga ko nagtaliwan nga adlaw hay sangka illegal nga nagapataya ro nadakpan sa parte it Oyo Torong gamit ro legal number game it PCSO nga STL.
Gindugang pa ni alyas Toto nga makaron hay uman eon man nga nagnaba ro andang kita bangud sa pag-eapnaag eon man it operasyon it bookies.
Maabu suno kana nga naga-kagat bilang bookies bangud sa mas mataas nga porsiyento nga mabaton kumpara kanda nga mga legal.
Ro mga lehitimong nagapadaeagan it STL sa probinsiya hay may nagakaigo nga permit halin sa Philippine Charity Sweepstake Office (PCSO).
