KALIBO, Aklan—Nagapangatubang sa kasong pag-eabag sa Presidential Decree 1602 ukon Illegal Gambling ro tatlong ka mga indibidwal matapos nga maaktuhang nagasugae it tong-its sa Brgy. Aliputos, Numancia.
Ginkilaea it Numancia PNP ro mga raya nga sanday Maribel Flores, 41-anyos; Joely Respecia, 40-anyos, parehong resident it nasambit nga lugar ag si Rudsam Cualez, 59-anyos ag residente it Brgy. Pusiw sa nasambit nga banwa.
Ro tatlo hay naaresto pinaagi sa Anti Illegal Gambling Operation it Numancia PNP kon sa siin nabueo sa andang posisyon ag kontrol ro sangka unit it baraha ag kapin sa P390 nga kwarta nga ginamit bilang taya.
Ro tatlo hay presenteng nakakulong sa locked up cell it Numancia Police Station para sa nagakaigong disposisyon.
Samtang sa pihak nga parte, arestado man ro daywang ka mga kaeaeakin-an sa sangka namatyan matapos nga maaktuhang nagasugae it pusoy-bahig sa Brgy. Ibao, Lezo.
Ginkilaea it Lezo PNP ro daywa nga sanday Bejay Fulgencio, 37-anyos ag si Michael Estrella, 21 ag parehong residente it nasambitang lugar.
Base pa sa mga otoridad maabo sanda nga nagahampang apang daywa eamang ro nadakpan matapos nga madasig nga nakadaeagan ro andang mga kaibahan.
Ro daywa hay presenteng nakakulong sa Lezo Police Station para sa nagakaigong disposisyon.
