KALIBO, Aklan—Ginkumpirma it Dr. Rafael S. Tumbukon Memorial Hospital nga an-om sa andang laboratory personnel ro nagpositibo sa RT-PCR SARS 2 agent for COVID-19 ag makarun hay presente eon nga naka-quarantine.
Ginakaeakipan raya it ap-at ka mga medical technologist, sambilog nga encoder ag sangka utility worker.
Angot kara, nagapadayun ro andang ginahimo nga contact tracing sa mga indibidwal nga direktang nakasalamuha it natungdan nga mga pasyente agud nga maabisuhan nga magpatigayun it self-quarantine sa sueod it 14 diyas.
Ro kaeuwasan sigon it publiko ro andang gina-prayoridad.
Bangud kara, pagalimitahan sigon nanda ro mga bag-ong admission sa ospital apang padayun gihapon sanda nga magabaton it pasyente sa Out Patient Section (OPD), emergency surgical/obstetrical ag iba pang medical condition nga nagakinahang-ean it nagakaigo nga pagtatap.
Kung madumduman nauna eon nga nagpositibo ro sangka 22-anyos nga babayeng laboratory staff it ospital kung sa siin ginasugid nga owa man raya it travel history.
Nagapadayun pa ro ginahimo nga assessment it Provincial Health Office ukon PHO-Aklan para matumod kung raya hay makabig eon nga local transmission it sakit sa probinsya it Aklan.
