Kalibo Aklan ——-Natigayon eon nga ma-rescue ro tanan nga an-um nga mga mangingisda nga napabalitang naduea miyerkules it aga-aga sa kasagsagan it pagpanaeasa it bagyong dante sa Aklan.
Suno kay Reynard dela Cruz it Municipal Disaster Risk Reduction and Management Office (MDRRMO)-Nabas nga bandang alas-8:15 kaina it agahon hay unang nakita nga nagapaeutaw-eutaw sa tubi sakay it anang baroto si Allan Parohinog it Barangay Alimbo Baybay sa baybayon nga sakop it nabas ag makataliwan ro pilang minuto naispatan ro mag-live-in partner nga sanday Roiland Estoya ag Aiza Bautista, parehong residente it Barangay Buenasuerte, mga 8 nauticals miles halin sa bibi it eawod nga naga-eutaw-eutaw man samtang sakay it andang baroto .
Ginasugid nga naubusan it gasolina ro andang baroto sa tunga it eawod.
Madumduman nga nauna eon nga naka-uli it eowas ro tatlo nandang kaibahan nga nagpa-eawod nga sanday Russel Valeriano, 46 anyos , Renato Ablen, 15 anyos ag Eugen Borris, 26 anyos matapos nga nagtinguha nga maayos ro andang nasamad nga baroto nga kulay dark gray kun sa siin ginasugid nga ginbuligan pa sanda ni parohinog .
Naka-abot sigon sanda sa bibi it baybay sa pihak it mabaskog nga humbak ag uean.
Gindugang pa ni dela cruz nga ro mga na-rescue hay gindaea sa andang mga natungdan nga Barangay council ag pagkatapos hay ginturn-over sa andang pamilya.
Sa report it MDRRMO Nabas nga nagpaeawod ro mga raya sa pihak it paandam nga magatama ro bagyong dante kun sa siin ro northern portion it Aklan hay ginpaidaeum sa storm signal no. 2.
