KALIBO, Aklan—Kapareho it ibang grupo ag organisasyon, magapatigayun man it maeapnagon nga hub-eag protesta ro Anak Pawis Partylist kadungan it ika-lima nga State of the Nation Address ukon SONA ni Pangueong Rodrigo Duterte sa Lunes, Hulyo, 27.
Suno kay former Anak Pawis Partylist Representative Ariel Casilao, magalunsar sanda it people’s SONA version kung sa siin igapat-pat sigon nanda ro mga matuod nga kahimtangan it nasyon sa tunga it paeag it COVID-19 pandemic.
Gusto sigon it andang grupo nga ipakita sa pumueoyong Filipino ro presente nga sitwasyon it nasyon.
Bangud nagapati sigon sanda nga indi raya pagtalakayon it Pangueo sa anang magiging diskurso.
Nagapati man si Casilao nga palpak ro mga naging tikang it gobyerno sa pagsukoe sa COVID-19 bangud eon man sigon sa mga natabo nga grabeng kurapsyon kamana man ro pilang pag-angal it mga owa nakabaton it ayuda.
Gindugang pa kara nga maskin nga ginalimitahan it pandemya ro andang protesta, bukon raya it rason agud nga indi sanda magapatigayon it physical protest.
Raya hay bangud sa grabeng pag-atake sigon sa kahilwayan ag kinamatarumng it mga pumueuyu.
Samtang, ginpasiguro man kara nga pagasundon it andang grupo ro mga health protocols kaibahan ro pag-mentina it physical ukon social distancing sa kada isaea, pagsuksok it facemask ag gloves kamana man nga maga-provide sigon sanda it mga disinfectants.
