KALIBO, Aklan—Haum eon nga magbaton it mga maga-uli nga Locally Stranded Individuals (LSIs) ro Barangay Andagao, Kalibo.
Suno kay Punong Barangay William Lachica Jr. nga nagpatigayun eon imaw it pueong kaibahan ro anang council agud nga mapreparahan ro pag-aeabutan it mga LSIs sa andang barangay.
Raya hay matapos nga nagpagguwa it resolution ro National Inter-Agency Task Force nga gina-lift eon ro moratorium sa pagbyahe it mga LSI pauli sa probinsya it Aklan.
Antes sigon nanda nga pasugtan nga mag-uli sa andang barangay ro sangka LSI hay pagatan-awun anay nanda kung pasado sa guidelines ro baeay nga paga-ulian kara para sa pagpatigayun it 14 days mandatory quarantine.
Kaibahan sa mga kinahang-ean nga ipakitang dokumento it mga LSI hay ro medical certicate, travel authority ag certificate of acceptance.
Ro medical certificate hay nagapamatuod nga owa it Coronavirus Disease 2019 ukon COVID-19 ro sangka LSI ag bukon man it kaibahan sa mga suspected case samtang ro travel authority hay nagapakita nga ginapasugtan raya nga makabiyahe ag ro certificate of acceptance hay nagapamatuod nga ginabaton raya it banwa nga anang gina-ulian.
Samtang, ginpaathag man it opisyal nga totally recovered eon ro limang confirmed cases nga nailista sa andang barangay kamana man nga ro andang miyembro it pamilya hay nai-release eon ko adlaw it Martes halin sa COVID Center kung siin sanda gin-isolate.
Bangud kara, indi eon kinahang-ean nga magpaidaeom pa sa surgical lockdown ro andang lugar.
