KALIBO, Aklan—Nagpabutyag it hantup sa tagipusuon nga pagpasaeamat si Andagao punong barangay William Lachica Jr. sa mga pumueuyu sa banwa it Kalibo nga nagtau kana it kahigayunan nga makapanerbisyo bilang miyembro it sangguniang bayan.
Nasayuran nga sa partial unofficial result it comelec, nagapangatlo si Lachica sa mga nagdaog nga konsehal it Kalibo.
Ginpasaeamatan nana ro anang pamilya partikular ro anang ama nga si dating Kalibo mayor William Lachica ag ro iba pang mga tawo nga nagbulig ag nagsuporta kana sa owa nana ginaeauman nga resulta it bag-o eamang natapos nga eleksyon.
Ginpromisa nana nga pagapadayunon ro mga mayad nga binuhatan it anang ama kat alkalde pa raya it banwa.
Pila sa anang plano hay ro pagpabaskog sa health services eabi eon ro pagbulig sa mga kubos nga owa it ikasarang nga magpabueong sa andang mga ginabatyag nga sakit ag ro kinahangeanon nga mga bueong.
