KALIBO, Aklan—Aprubado sa ikaywang pagbasa it Sangguniang Panlalawigan ro annual budget para sa 2021.
Ginaeauman nga eubusan nga maaprubahan ro P2,004,450,307 pesos nga pondo sa ikatlong pagbasa sa pagbalik it session it provincial board sa Disyembre 1, 2020.
Sa nasambit nga numero, ro P1,452,850,307 pesos hay gintaeana para sa regular fund ukon 72 porsiyento it dag-unan nga budget, samtang ro P551,600,000 pesos ukon 28 percent hay maagto sa operasyon it local economic enterprise.
Ginatutukan makaron it probinsiya ro pagtau it basic services ag mapabilin ro mga proyekto ag programa para sa pag-angkon it bastanteng pagkaon, ikamayad nga eawas ag Covid-response sa mga ginakabig nga pinaka vulnerable tuga it pagbagsak it ekonomiya daea it epekto it pandemya.
Ko nagtaliwan nga Oktubre 16 hay ginpasa ni Aklan governor Florencio Miraflores ro proposed 2021 General Fund and Economic Enterprise and Development Department (EEDD) sa 18th SP para sa review ag enactment.
Ro 20 porsiyento it dag-unan nga pondo hay naghalin sa national government Internal Revenue Allotment (IRA) nga naga-abot sa 1.3 bilyon pesos , kita halin sa local tax nga may P115 milyon pesos ag non-tax revenues nga P40-million pesos kamana ro ginaeauman nga kita it economic enterprises it gobyerno probinsiyal nga P552 milyon pesos.
Nataeupangdan sa committee report nga nakaangkon it 11 percent nga pagnaba sa P270,000 pesos nga estimated nga target revenues sa masunod nga dag-on.
Halin sa P2.3 bilyon pesos nga projected receipts makaron nga dag-on sa haeos P2 bilyon pesos sa 2021 bangud sa coronavirus pandemic.
Sa pihak kara, makabo-oe gihapon ro aklan it mas mabahoe nga share it IRA ukon pitong porsiyento nga pagtaas sa 2021 ukon may pagtaas nga P1.2 bilyon pesos sa P1.3 bilyon pesos.
Pila sa mga proyekto nga pagataw-an it pondo it provincial government hay ro construction it evacuation centers, multi-purpose pavements ag Ligtas Covid Centers, ag provision it personal protective equipments (PPEs) para sa frontliners.
