Kon amat baea hay matsa gaoy ka?
May nagahambae baea nga ikaw hay maeupsi?
Ikaw baea hay nabdos ukon eampas sa edad 60?
Kon makarondaya ro imong sitwasyon, ipa-check ro dugo para sa anemia.
Ro anemia hay ordinaryong kondisyon kun sa siin kueang sa pueang dugo (red blood cells) ro eawas.
Nasayuran nga ro pueang dugo ro nagadaea it oxygen sa bilog nga eawas.
Kaeabanan, ro anemia hay ginatawag nga iron-deficiency anemia (IDA).
Ro daywang nagapangunang rason kara hay ro kakueangan it nutrisyon halin sa pagkaon ag ro pag angkon it anumang pagdugo sa eawas.
Samtang, ginasugid nga problema it Pilipino ro anemia.
Suno sa DOST ag FNRI Seventh National Nutrition Survey ko 2008, ro iron-deficiency anemia hay nakakaapekto sa ap-at sa kada 10 nga nabdos sa Pilipinas.
Para sa mga eapsag umpisa 6 nga buean hasta sang dag-on, 56 percent hay may anemia man.
Sa mga unga nga naga edad 1 hasta 12 years old, may 20 percent ro anemic man.
Pag-abot man sa mga edad 60 pataas, may tatlo sa kada 10 nga senior citizens ro kueang sa dugo.
Ro komplikasyon kara sa mga nabdos hay pwedeng mapa temprano ro pag unga it eapsag.
Para sa mga unga man nga may anemia, pwede sanda nga maging putot, maniwang, masakiton ag nabudlayan sa pagtuon .
