KALIBO, Aklan—Pagapasugtan eamang sigon it Boracay Inter-Agency Task Force (BIATF) ro hinyu it mga negosyante nga maggamit eon lang it rapid antigen tests sa baylo nga Reverse Transcription-Polymerase Chain Reaction (RT-PCR) tests sa mga turistang gustong magbakasyon sa isla kon mapabaskog it lokal nga gobyerno it malay ag aklan ro andang ikasarang sa contact-tracing ag pagpatuman it health ag safety protocols.
Suno kay Malay Mayor Frolibar Bautista nagapadayun makaron ro training it andang mga tawuhan, kaibahan ro provincial government ag Malay Police Station angot sa case investigation, contact-tracing, referral, ag iba pang COVID-19 related operations.
Ro training suno kana hay ginapanganahan it team ni Baguio City Mayor ag Contact-Tracing Czar Benjamin Magalong nga nagbisita sa isla ko nagtaliwan nga domingo.
Mag-eowas kara, ginatun-an man suno kana it gobyerno pinaagi sa department of tourism nga sabton eon lang ro bayad sa swab tests it mga non-Aklanon tourists ukon panabaan ro presyo kara sa tunga it reklamo nga masyado eon nga magastos ro magbakasyon sa isla.
Nagaeaum sigon sanda nga makapaguwa si mayor Magalong it rekomendasyon sa task force sa mas madali nga tiempo.
