KALIBO, Aklan— Padayon nga ginaimbestigahan it mga kapulisan ro pagkaduea it rebulto it antigong Sagrada Pamilya sa sueod it kapilya sa Sitio Banika, Barangay Ambulong, Batan, Aklan.
Nadiskubrehan ro pagkaduea kara kat nag-agi sa lugar si Kagawad Stephen Bolivar rason nga gilayong gin-impormahan si Punong Barangay Ramy Jacinto.
Base sa report, nangawa sigon si Bolivar kat mapan-uhan kara nga bukas ro pwertahan it kapilya ag kat tan-awon sa sueod, nataeopangdan kara nga naduea ro rebulto sa altar.
Ginasugid nga human sa porselana ro nasambitang rebulto ag ginapatihan it mga katigueangan sa lugar nga may maeahaeong materyal ro mga alima kara.
Samtang, nakit-an ro korona it rebulto sa paeayan maeapit sa lugar.
Nagabueoligan eon sa makaron ro Barangay council, Batan Police Station ag asosasyon it Simbahang Katolika agud matumod kon sin-o ro posibleng may kahimuan it panakawan.
