KALIBO,Aklan–Ginatugyan eon lang ni Antique Governor Rodora Cadiao sa anang legal counsel ro ginapangatubang kara nga kaso sa Ombudsman kasuno sa anang pagpyansa.
Suno kay Atty. Nery Duremedes, Antique Provincial Administrator nga uwa nagakaangay ro kaso nga ginpasaka kontra sa gobernadora kon sa siin ana eamang nga ginproteksyunan ro sangguniang panlalawigan maging ro mga Anitiqueño.
Una kara, ginkasuhan ro opisyal sa pag-eabag sa Anti-Graft and Corrupt Practices Act kon sa siin may nagguwa nga warrant of arrest nga pirmado ni Sandiganbayan Seventh Division Chairperson Associate Justice Ma. Theresa Dolores Estoesta ag may pyansa nga P90,000 nga insigida man nga gin-atubang it opisyal sa korte.
Samtang sa pihak nga parte, ginpaathag ni Atty. Pampross Pagusan, personal lawyer it gobernadora nga nag-ugat ro kaso ko dag-on 2016 matapos nga ginsaylo ni Cadiao si General Services Office head Antonio Dela Vega sa andang satellite office sa Culasi, nga may kaeayuon nga 100 kilometers sa provincial capitol sa banwa it San Jose.
Nagpangayo it bulig si Dela Vega angot sa anang ”transfer order” sa Civil Service Commission, sa pagpati nana nga katumbas raya it ”constructive dismissal”.
Ko Marso 2017, ginmando it Civil Service Commission ro pag-reinstate kay Dela Vega sa Provincial General Services Office ag gin-request ro provincial government nga bayaran ro anang representation ag travel allowance (RATA) ag iba pang mga benefits nga nagakadapat kana halin kat ginsaylo imaw sa Culasi, ko Hulyo 2016 hasta Pebrero 2018.
