KALIBO, Aklan—Nadugangan it 19 ro local cases sa probinsiya it Antique it mas makataeapon nga Delta variant it COVID-19 base sa ginpaguwa nga impormasyon it Department of Health – Western Visayas ko Biyernes.
Suno kay Antique Governor Rhodora Cadiao nga nagsaka eon sa 22 ro kabilugan nga local cases it Delta variant sa andang probinsiya ag daywa kara ro namatay.
Raya hay resulta sigon it kapin sa 500 nga specimen samples nga second batch nga andang ginpadaea agud nga ipaidaeum sa genome sequencing ko hulyo 5 ukon masobra sa sang buean eon ro nagtaliwan.
Sandig suno kana sa mandu it DOH hay kinahangean nga magsumite it random sampling ro kada probinsiya it kapin sa 500 hasta 750 para sa genome sequencing.
Sa nasambit nga numero, sambilog ro namatay ag ro nabilin nga iba pa hay nagmayad eon.
Ginpahayag ni Cadioa nga lima sa mga bag-ong kaso hay naghalin sa Pandan; tig sambilog sa Libertad, Sebaste, Culasi ag tig-daywa sa bugasong ag San Jose.
Kaabuan suno kana sa mga tinamaan it delta variant hay owa nakasayod nga carrier sanda kara.
Bangud kara, ginaduso sigon nanda nga mga gobernador sa bilog nga western visayas nga makaangkon it laboratoryo para sa genome sequencing bangud nga masyadong mabuhay magguwa ro resulta halin sa Philippine Genome Center.
Sa makaron hay mas pa sigon nanda nga ginpabaskog ro andang mga tikang eabi eon sa mga lugar nga may bag-ong delta variant cases kamana man sa mga lugar nga mataas ro numero it mga taeapnan.
Mag-eowas kara, ginhugtan man nanda ro andang border control checkpoints.
Gin-convert man nanda ro culasi emergency hospital nga dugang nga covid facility hospital nga may 50 bed-capacity mag-eowas sa andang anghel salazar provincial hospital nga may 100 bed capacity.
Nagpahaum man sanda it dugang nga mga kagamitan kapareho it mga oxygen ag ventilator bilang preparasyon sa worst case scenario.
Ro Antique hay may kabiliugan nga 733 nga aktibong kaso.
Madumduman nga 31 nga bag-ong kaso it Delta variant ro nailista sa Western Visayas.
Samtang, kapareho sa probinsiya it Aklan, ginmanduan man nana ro anang mga alkalde nga magpahaum it burial grounds para sa mga namatay nga covid victim.
